Poésie : Il ne falloit, Maistresse, autres tablettes

Titre : Il ne falloit, Maistresse, autres tablettes

Poète : Pierre de Ronsard (1524-1585)

Il ne falloit, Maistresse, autres tablettes
Pour vous graver, que celles de mon cœur,
Où de sa main Amour nostre veinqueur
Vous a gravee, et vos graces parfaites.

Là voz vertus au vif y sont portraites,
Et voz beautez causes de ma langueur,
L'honnesteté, la douceur, la rigueur,
Et tous les biens et maux que vous me faites.

Là voz cheveux, vostre œil et vostre teint,
Et vostre front s'y monstre si bien peint,
Et vostre face y est si bien enclose,

Que tout est plein : il n’y a plus d’endroit
Qui ne soit vostre : et quand Amour voudroit,
Il ne pourroit y graver autre chose.